القهررررررررر
القهر
القهر كلمة حروفها قوية .. بتنطق من جوه .. من اعماق حنجرتك
ومخارج الحروف بتكون تقيله علشان بندوس عليها وحنا بننطقها
وده اللى اكتشفته إن كل كلمه تنطق بطريقة تعبر عن معناها ،
ولأن القهر معنى قاسى وموجع فنطق حروفه قاسى زي معناه ...
المهم اللى عاوزة أأقوله ان القهر له أشكال كتير أوى ..واقسى شكل ليه هو القهر المعنوى ...
يعنى مش كل منع .أو حرمان يبقى قهر.. لكن المنع المصحوب بالتجريح أو الإهانه
والحرمان المصحوب بالذل ده يبقى قهر .. لما يكون فى ايد حد انه يمنحك حاجة
ويحرمك منها مش لأى داعى غير انه يستخسرها فيك ده يبقى اسمه قهر ...
لما تتوجع وماتقدرش تقول أه ... ده يبقى اسمه قهر ...
لما تتأذى من اقرب الناس ليك وحقك يتهضم ده يبقى اسمه قهر ...
لما حد يمنحك حاجة مشروطه ويستنى قبل مايدهالك المقابل ليها ده يبقى اسمه قهر ...
ولما يستغل احتياجك ويذلك لما يحققهولك ... ولما تفضل تدى ووتفنى نفسك عشان غيرك وغيرك ده ولا حاسس بيك وبيعتبر عطائك ده حق مستحق يبقى قهر ولا مش قهر ...
لما تأجل كل حياتك وطموحاتك وتقف فى اخر الصف وتبدى غيرك عليك ... ولما يجى
دورك بعد طول انتظار عشان تحقق اللى أجلته من أجل غيرك ويقال لك خلاص راح عليك الدور ده يبقى قهر ولا مش قهر ...
لما اقرب الناس ليك يعرف ان حياتك او موتك فى حاجة معينة ويستغل مكانته فى
حياتك علشان يحرمك منها وهو عارف كويس اوى انه بيحرمك من الأكسجين اللى
هاينقذ حياتك ويمنعك عنه.....
ومش بس كدا كل مابيشوفك بتحضر قدامه يقولك وهو بيطلعلك لسانه مامعناه انه مش هايمنحهولك...
وبعد كل ده لما يبقى قدامك فرصة تنتقم من اللى قهروك وتردلهم اللى اتعمل فيك
وتقف عاجز وماتقدرش لاى سبب من الأسباب ده يبقى اسمه ايه !!!
ليست هناك تعليقات:
إرسال تعليق